កង្វល់ និងបញ្ហា របស់ប្រជាពលរដ្ឋនៅក្នុងសង្កាត់ត្រូវបានលើកឡើងក្នុងវេទិកាសាធារណៈក្រុមការងាររាជរដ្ឋាភិបាលចុះមូលដ្ឋានសង្កាត់បារាយណ៍

 

ព្រៃវែង៖ នៅព្រឹកថ្ងៃទី ៤ ខែវិច្ឆិកា ឆ្នាំ ២០២៤ នៅសង្កាត់បារាយណ៍លិច បានរៀបចំវេទិកាសាធារណៈក្រុមការងាររាជរដ្ឋាភិបាលចុះមូលដ្ឋានសង្កាត់បារាយណ៍ ដើម្បីសិក្សាស្វែងយល់អំពីបញ្ហាដែលគាត់ជូបប្រទះប្រចាំថ្ងៃលើកឡើងដើម្បីធ្វើការដោះស្រាយ ជូនគាត់ឲ្យបានទាន់ពេលវេលា និងមានតម្លាភាព។ ដែលពិធីនេះមានការអញ្ជើញចូលរួមពី ឯកឧត្តម អ៉ិត សុត្ថា រដ្ឋលេខាធិការ នៃរដ្ឋលេខាធិការអធិការដ្ឋានកិច្ចការព្រំដែន អនុប្រធានទី១ ក្រុមការងាររាជរដ្ឋាភិបាលចុះមូលដ្ឋានក្រុងព្រៃវែង និងជាប្រធានក្រុមការងាររាជរដ្ឋាភិបាលចុះជួយសង្កាត់បារាយណ៍។ 

ក្នុងនោះលោក ឈឹម សារ៉ូយ ចៅសង្កាត់បារាយណ៍ ក៏បានលើកឡើងថា ចំពោះការអនុវត្តគោលនយោបាយភូមិឃុំមានសុវត្ថិភាព សង្កាត់បារាយណ៍បានអនុវត្ត ជាប្រចាំ ដោយទទួលបានលទ្ធផលគួរជាទីមោទនៈនៅក្នុងសង្កាត់បារាយណ៍គឺពុំមានអ្វីកើតឡើងគួរឲ្យកត់សម្គាល់នោះទេ។ 

ក្នុងនោះដែរលោក ចៅសង្កាត់ ក៏បានបន្ថែមទៀតថា នៅក្នុងសង្កាត់បារាយណ៍ក្នុងឆ្នាំ ២០២៤ នេះ រដ្ឋបាលសង្កាត់បារាយណ៍ បានអនុវត្ត ៣ គម្រោង នៅក្នុងនោះគឺផ្លូវបេតុង ២ ខ្សែប្រវែង ៣០០ ម៉ែត្រ។ លូរំដោះទឹក ១ ខ្សែប្រវែង ១០០ ម៉ែត្រ និងផ្លូវក្រាលសាច់ភ្នំ ២ ខ្សែប្រវែង ១,២៥០ម៉ែត្រ។ 

លោក ចៅសង្កាត់ ក៏ដាក់ទិសដៅអនុវត្តបន្ត ដោយរដ្ឋបាលសង្កាត់បារាយណ៍និងប្រឹងប្រែងអភិវឌ្ឍន៍ ភូមិសង្កាត់ឲ្យមានការរីកចម្រើនជាបន្តទៀត នៅឆ្នាំ ២០២៥ ខាងមុខ នេះ ដោយប្រើប្រាស់ប្រាក់មូលនិធិសង្កាត់ជា ២ គម្រោង៖ ១. គម្រោងទី១ សាងសង់ផ្លូវបេតុង ២ខ្សែប្រវែង ៤៥០ ម៉ែត្រ ដាក់នៅភូមិទាំង ២ ក្នុងសង្កាត់បារាយណ៍ ។ ២. ដាក់អំពូលសូឡាចំនួន ៦០ ដើម ដាក់នៅភូមិបារាយណ៍លិចចំនួន ៣០ ដើម សាលាសង្កាត់ចំនួន ១០ ដើម និង ភូមិបារាយណ៍កើត ២០ ដើម ។ ៣. ទំនាក់ទំនងរកដៃគូឲ្យជួយស្តារប្រឡាយ ទាំង ២ ក្នុងភូមិបន្តទៀត ។ ៤. ទំនាក់ទំនងសម្បុរសជន និងរដ្ឋបាលក្រុង ឲ្យជួយស្ថាបនាផ្លូវបេតុងកន្លែងអទិភាពចាំបាច់បន្តទៀត ។ ៥. ខិតខំបំរើសេវាជូនប្រជាពលរដ្ឋ ទាំងសេវារដ្ឋបាលនិងសេវាសាធារណៈឲ្យបានល្អប្រសើរជាងឆ្នាំកន្លងទៅ ។ ក្នុងនោះដែរលោក ចៅសង្កាត់ ក៏បានលើកឡើងនៅបញ្ហាប្រឈម និងសំណូមពរ៖ - ការចេញប័ណ្ណកម្មសិទ្ធដីធ្លីជូនប្រជាពលរដ្ឋទាំង ២ ភូមិ មិនទាន់បាន។ - គ្រោះថ្នាក់ចរាចរណ៍កើតមានឡើងញឹកញាប់ នៅចំណុចរង្វង់មូលនាគព័ន្ធ។ 

នៅក្នុងនោះផងដែរ ប្រជាពលរដ្ឋគាត់ក៏បានលើកឡើងអំពីបញ្ហា និងសំណូមពររបស់គាត់នៅក្នុងអង្គវេទិកាចំនួន ៦ សំណួរ ដោយក្នុងនោះដោះស្រាយបាន ៥ សំណួរ និងនៅសល់ ១ បញ្ហាទៀត ចំពោះបញ្ហាដែលនៅសល់មួយនេះ គឺបញ្ហាចេញប្លង់ជូនប្រជាពលរដ្ឋដោយសារដីរបស់គាត់នៅជាប់នឹងចំណីបឹង ដូច្នេះបន្តមតិវិធីទៅថ្នាក់លើបន្ថែមទៀតដើម្បីធ្វើការដោះស្រាយ៕